“2019ലെ പ്രവാസി ഡിവിഡൻറ്റ് പദ്ധതി പ്രകാരം നിക്ഷേപം നടത്തിയിട്ടുള്ളവർക്ക് തങ്ങളുടെ നിക്ഷേപം 3 വർഷം പൂർത്തിയാകുന്ന മുറയ്ക്ക് നിക്ഷേപകരുടെ ബാങ്ക് അക്കൗണ്ടിലേക്ക് ജനുവരി മുതൽ ഡിവിഡൻറ്റ് നൽകി തുടങ്ങുന്നതാണ്. എല്ലാ നിക്ഷേപകരും അവരുടെ ബാങ്ക് അക്കൗണ്ടുകൾ സജീവമായി നിലനിർത്തേണ്ടതാണ്. ബാങ്ക് വിവരങ്ങൾ അപ്ഡേറ്റ് ചെയുന്നതിനായിയുള്ള സംവിധാനം ലോഗിനിൽ നൽകിയിട്ടുണ്ട്.”

പ്രവാസി കേരളീയരുടെ ക്ഷേമ പരിപാടികള്‍ വിപുലപ്പെടുത്തുന്നതിന്‍റെ ഭാഗമായും പ്രവാസി നിക്ഷേപങ്ങള്‍ ഫലപ്രദമായി ജന്മനാടിന്‍റെ വികസന പ്രവര്‍ത്തനത്തിനായി ഉപയോഗപ്പെടുത്തുന്നതിനുമായി കേരള സര്‍ക്കാര്‍ മുന്നോട്ട് വയ്ക്കുന്ന നൂതന ദീര്‍ഘകാല നിക്ഷേപ പദ്ധതിയാണ് ‘പ്രവാസി ഡിവിഡന്‍റ് പദ്ധതി’. നിക്ഷേപ സുരക്ഷയോടൊപ്പം പ്രവാസികള്‍ക്കും അവരുടെ ജീവിത പങ്കാളികള്‍ക്കും ജീവിതാവസാനം വരെ ഉറപ്പാക്കപ്പെട്ട മാസവരുമാനം ലഭ്യമാകുന്നു എന്നത് ഇതിന്‍റെ ഏറ്റവും വലിയ സവിശേഷതയാണ്. 3 ലക്ഷം രൂപ മുതല്‍ 51 ലക്ഷം രൂപ വരെയുളള നിക്ഷേപങ്ങള്‍ പ്രവാസി കേരളീയരില്‍ നിന്നും സ്വീകരിക്കുകയും അത് സര്‍ക്കാര്‍ നിശ്ചയിക്കുന്ന ഏജന്‍സികള്‍ക്ക് കൈമാറി അടിസ്ഥാന സൗകര്യവികസനത്തിനായി വിനിയോഗി ക്കുന്നതുമാണ്.